Украинаның экономикалық даму министрлігі Ресей қаңтардың 4-нен бастап, өз аумағы арқылы өтетін украин тауарларының транзитін толық тоқтатқаны туралы хабарлады. Аталған жағдай бұған дейін шыққан президент Владимир Путиннің бұйрығы бойынша қалыптасты. Украин тарабы бұл оқиғаны "ашық емес, қисынсыз және кемсітетін" деп атап, Ресейді Дүниежүзілік сауда ұйымы аясында мойнына алған міндеттемелерді орындамай отырғаны үшін айыптады.
Путин қаңтардың 1-де Украинадан келетін транзиттік жүк тасымалын реттейтін жарлыққа қол қойған болатын. Онда Ресей арқылы Қазақстанға баратын украин тауарларының тек Белоруссия аумағымен өте алатыны көрсетілген. Бұдан бөлек, тасымалдаушы ГЛОНАСС навигациялық жүйесі негізіндегі секілді тек ережеде көрсетілген айқындаушы құралдарды пайдалануы тиіс.
Сонымен бірге, 2016 жылы қаңтардың 1-нен бастап Ресей мен Украина арасындағы еркін сауда аймағы туралы келісім де тоқтатылды. Бұл Украина мен ЕО арасындағы еркін сауда аймағы туралы келісімге қарсы жауап болып отыр.