Бердібек Сапарбаев Мұғалжар ауданындағы сегіз жүзге тарта тұрғыны жарықсыз отырған Қайыңды ауылына электр қуатын тартып бергенге дейін, аудан әкімінің үйіндегі жарықты қиып тастауға бұйрық берді.
Облыс әкімі: «Ауыл 10 жылдан бері жарықсыз отыр, ал сіздің үйіңізде жарық бар. Әкім мен оның орынбасарының үйін электр қуатынан ажыратуға бұйырамын. Қайыңдыға жарық келген күні ғана қосасыздар», - деп энергетиктерге тапсырма берді.
Одан бөлек, өңір басшысы аудандағы жол құрылысын да сынға алған.
«Сіз ауданды 11 жыл басқарып отырсыз және осы уақытта небәрі 11 көшеге асфальт төсепсіз. Жылына – бір көшеден. Қалған 30 көшені қалпына келтіру үшін сізге 30 жыл керек болар», - деп мысқылдады Сапарбаев.