Чек арачылар аны аэропортто бир саат кармап турган соң, Тажикстанга депортация кылышкан. Абдураззоков Санкт-Петербург шаарында 5-апрелде башталган “Орусиядагы жолугушуу” театр-фестивалына катышуу үчүн барган болчу.
Барзу Абдураззаков кыргызстандык артисттер менен Бишкектен Москвага жөнөгөн. Андан ары Санкт-Петербургга учушу керек эле. Алар Орусиянын экинчи баш калаасында КМШ жана Балтика мамлекеттеринен келген театр өнөрпоздорунун “Орусиядагы жолугушуу” фестивалына катышмак. Иш-чарага “Маңкурт жөнүндө баян” спектаклин даярдап баратышкан.
Режиссерду “Домодедово” аэропортунда чек арачылар текшерип, бир сааттай кармап турган соң, “Москва-Куляб” каттамы менен ошол эле күнү Тажикстанга учуруп жиберишкен.
“Фестиваль ачылган күнү мен Дүйшөмбүдө болдум. Биздин команда мен жок эле катыша баштады”-деди Абдураззаков.
57 жаштагы Барзу Абдураззоков Тажикстанда эмгек сиңирген артист. Ал өлкөсүндө гана эмес, чет элде да таанылган. 2013-жылдан бери Бишкектеги Чыңгыз Айтматовдун атын алып жүргөн орус драма театрында да эмгектенүүдө. Эки ирет “Кыргызстандагы мыкты режиссер” наамын да алган.