Купуя аудиодо индиялык улуттук-диний Холи майрамын белгилеген улан-кыздарды милиция кызматкерлери кармап, ур-соккуга алгандыгы жазылган.
Тажикстандын ичи иштер министрлиги милициядан ыдык көргөн жаштарды арыз менен кайрылууга чакырды. ИИМ басма сөз катчысы Жалолиддин Садриддинов чындыгында эле 15-майда көчөдөн Холи майрамын белгилеген жаштардын тобу кармалгандыгын кабарлады. Анын айтымында, алар суралгандан кийин эле кое берилген.
Кыйноолорго каршы бейөкмөт уюмдардын коалициясынын мүчөсү Дилрабо Самадова аталган аудиотасманы иликтеп, «милиционерлер кармалгандарга 16 мүнөт ичинде 25 жолу кол көтөргөндүгүн” айтып чыкты.
Майрамды уюштуруучулардын айтымында, аны өткөрүүгө расмий уруксат алынганы менен катышуучулардын бир даары үйүнө бараткан жерден кармалышкан. Алар бири-бирине түстүү упа ыргытылгандан кийин бети-башын жууй элек абалда болушкан.