Ссылки доступа

“Өзбекстан ислам кыймылынын” негиздөөчүлөрү тууралуу тасма тартылууда


Өзбекстанда ислам согушкерлерине жана жат идеологияга  каршы тасманы тартуу аягына чыгып баратат. “Ыйык тилек” (“Мукаддас истак”) деп аталган фильмде тутунган дини үчүн совет бийлиги тарабынан куугунтукка алынып, бирок эгемендүүлүк алгандан кийин эркиндикке чыккан катардагы кишинин өмүрү баяндалат.

Тасманын башкы каармандарынын арасында “Өзбекстан ислам кыймылы” террордук тобунун негиздөөчүлөрүн чагылдырган образдар бар. Фильм “Өзбеккино” улуттук агенттигинин буйрутмасы менен “Өзбекфильм” киностудиясында тартылууда.

“Азаттыктын” өзбек кызматына белгилүү болгондой, тасма Өзбекстандын эгемендүүлүгүнүн 25-жылдыгын утурлай кинотеатрларда коюлат. Аны тартууга бюджеттен 1 миллиард сумдун тегерегиндеги каражат бөлүнгөнү айтылууда.

“Ыйык тилек” тасмасындагы эки образ – Тахир Юлдаш менен Жума Намангани – 20-кылымдын 80-жылдары Наманган шаарында ислам топторун түзгөн тарыхый инсандар. Алар Өзбекстандан кетип калып, 1991-жылдын декабрында Ислам Каримов президент болуп шайлангандан кийин кайтып, Тажикстанда жарандык согуш болуп жатканда ислам оппозициясынын катарын толуктаган.

“Өзбекстан ислам кыймылын” 1998-жылы ушул эки адам негиздеген. Уюм Фергана өрөөнүндө ислам халифатын түзүү максатын көздөйт.

XS
SM
MD
LG