Ссылки доступа

«12 жыл күтүү» тасмасы Тажикстандагы эрте кыйылган никелерди сынга алды


12-июлда Дүйшөмбү шаарында бет ачаары өткөн «12 жыл күтүү» тасмасы Тажикстандагы эрте кыйылган никелерди сынга алды. Фильмде Фаришта аттуу кыздын турмушу баяндалат. Ал ата-энесин угуп, мектепти бүтөрү менен күйөөгө тийип, бирок тагдыры талкаланып калат.

Тасманын режиссеру Мухиддин Музаффардын айтымында, алар фильмде үй-бүлөлүк зомбулукту жана кайын энелердин «кыялын» көрсөтүүгө аракет кылышкан. «21-кылымда биздин аялдарыбыз кул болуп калышы мүмкүн экенин элестетүүгө болот. Аял өз алдынча инсан болушу керек. Анын жеке көз караштары болушу керек», - деди ал.

Музаффардын пикиринде, билим деңгээли төмөн же билими такыр эле жок болгон айрым аялдардын балдары дагы тийиштүү тарбия албай, келечекте коомдун «баш оорусу» болуп калат. «Биздин коом, биздин балдарыбыз энелерибиздин ой жүгүртүү деңгээлинен көз каранды. Биздин кыздарыбыз жана аялдарыбыз үй-бүлөлүү болушу керек, бирок алар билимдүү дагы болушу зарыл. Маселенин бул жагы учурда орчундуураак болуп турат. Бул тасма кыздарына билим берүүгө каршы чыккан ата-энелерге арналган», - деп кошумчалады ал.

«12 жыл күтүү» мелодрамасынын режиссеру бул фильм каармандын жеңиши менен бүтөт деп билдирди. Фаришта көп жыл күтүп, күйөөсү Орусиядагы түрмөдөн чыккандан кийин аны менен ажырашып кетет. Бирок кийинчерээк жубайлар кайра баш кошкусу келип, психологдун кеңеши менен билим алып башташат.

Тасманын продюсери Дилошуб Орифзода айткандай, фильм чыныгы окуяга негизделип тартылган. Ал тасма тартылардан мурун зомбулукка кабылган кеминде 40тай аял менен сүйлөшүп чыккан. Фильмдин сценарийин түзүүдө алардын турмушундагы окуялар алынган.

XS
SM
MD
LG