"Свобода" радиосу көз карандысыз адискөй журналистика катары өзгөрүп турган дүйнөдөгү кыйын кырдаал шартында өрнөк көрсөттү. Мындай пикирин чет элдик уктуруулар боюнча башкармалыктын (BBG) аткаруучу директору Жон Лэнсинг 25 жылдык маараке учурунда билдирди. BBG АКШдагы чет элдик берүүлөрдүн, анын ичинде “Эркин Европа/Азаттык” радиосунун камкор кеңеши болуп эсептелет.
Иш-чарага журналисттер, жарандык коом өкүлдөрү америкалык дипломаттар, "Свобода" радиосунун авторлору жана достору катышты. “Эркин Европа/Азаттык” корпорациясынын директору Томас Кент “Свобода” радиосунун журналисттери айрым учурда оор шартта иштешерин белгиледи. Ага карабай, тең салмактуу, бейтарап журналистиканы кубаттап, жогорку эл аралык нормалардын жана Адам укуктарын коргоо боюнча жалпы декларациядагы принциптердин чегинде жумуш алып барышарын кошумчалады.
АКШнын Москвадагы элчиси Жон Теффт “Свобода” радиосу жана анын Москвадагы бюросунун ролун ошондой эле Орусия менен дүйнөдөгү окуяларды бейтарап чагылдыруудагы ордун жогору баалады. Ал “Эркин Европа/Азаттык” радиосун “эркин прессанын гаранты” деп атап, орус кызматынын иши мурдагыдан дагы маанилүү экенин баса белгиледи.