«Екі күдікті ұсталды, біреуі тергеу абақтысында, ал екіншісі үй қамауында отыр. Тергеу 170 миллион доллардың шетелге қандай әдіспен шығарылғанын анықтап жатыр. Ұсталғандардың бірі 2004-2016 жылдары Қаржы министрлігінде жұмыс істеген. Екіншісі соның сыбайласы болған», - деп хабарлады «Азаттыққа» қаржы полициясының баспасөз хатшысы Азамат Шейшеев.
Ұсталғандарға қарсы заңсыз кәсіпкерлік және заңсыз кірісті заңдастыру қылмыстары бойынша қылмыстық іс қозғалды. Тергеу мәліметі бойынша, қаражат 2011-2016 жылдар аралығында «Манас» әуежайы арқылы Ресейге шығарылып отырған. Қылмыстық схемаға бірқатар коммерциялық банктердің де қатысы болуы мүмкін.
Күдіктілердің есімдері тергеуге кедергі болмас үшін аталмай отыр. Бірақ Қаржы министрлігінің баспасөз хатшысы Гүлмира Туголбаева күдіктілердің бірінің министрліктегі жұмыстан кеткеніне жарты жыл болғанын айтқан.
«Егер ол қазір осында жұмыс істеп жүрген болса, біз оның әрекетін өзіміз тергейтін едік. Қаржы полициясы оның 2016 жылдың қаңтарына дейінгі әрекеттерін ғана тергейді», - деді Туголбаева. Ресей асырылып келген қаражаттың көзі әзірге белгісіз. Заңсыз жолмен келген ақшаны шетелден Қырғызстан арқылы өткізген деген болжам бар.