Ссылки доступа

Тажикстанда Ходжа Халимдин иши боюнча 10 адам түрмөгө кесилди


Тажикстан Жогорку Сотунун төрагасы былтыр сентябрда Дүйшөнбү жана Вахдат шаарларында болгон козголоңго байланыштуу укук коргоо органдарында иштеген он чиновник түрмөгө кесилгенин билдирди. Алардын ичинде бирөө жогорку кызматта иштеген. Бирок Жогорку Соттун башчысы эркинен ажыратылгандардын аты-жөнүн жана кызматын атаган жок.

Жогорку Соттун төрагасы Шермухаммади Шохиён 18-июлда Дүйшөнбүдө өткөн маалымат жыйында мурдагы коргоо министринин орун басары Абдухалим Назарзоданын (Ходжа Халим) козголоңуна байланыштуу кылмыш иши аягына чыкканын жарыялады. Жыйынтыгында укук коргоо органдарында жогорку кызматта иштеген он аткаминер түрмөгө кесилди.

Ал Абдухалим Назарзоданын козголоңу бийликтин аракетсиздигинен келип чыкканын кошумчалады.

2015-жылы 4-сентябрда Вахдат шаарынын Ички иштер бөлүмүнө жана Дүйшөнбүдөгү милиция бөлүмүнө кол салуу болгон. Бийлик бул иш ал кезде Тажикстандын коргоо министринин орун басары болуп турган Абдухалим Назарзоданын колунан келди деп эсептейт. Куралдуу топко каршы операция Рамит капчыгайында 12 күн уланып, укук коргоо органдарынан 14 жана топтон 30дай адам набыт болгон.

Бул окуядан кийин 200дөй адам кармалган. Учурда Тажикстан соту алардын көбүнө карата өкүм чыгарды. Соттук жараян жабык түрдө өтүп, атүгүл мамлекеттик ММКлар чыккан чечимдер туурасында маалымат беришкен жок.

XS
SM
MD
LG