Ссылки доступа

Франция менен АКШ ИМ тобуна сокку урат


Франция менен АКШ “Ислам мамлекети”  террористтик уюмуна биргелешкен сокку урууга даярданууда.

France Info радиосуна 20-июлда француз ѳкмѳтүнүн ѳкүлү Сефан Ле Фоль айтып бергендей, чабуул Ирактагы Мосул шаарына жасалат. Бул калаа ИМдин негизги конуштарынын бири деп эсептелет дейт Deutsche Welle.

Ле Фолдун айтымында, Франциянын коргоо министри Жан-Ив Ле Дрнан учурда АКШда биргелешкен кол салуу боюнча сүйлѳшүүлѳрдү жүргүзүүдѳ. Шейшембиде Франциянын тышкы иштер министри Жан-Марк Эйро Вашингтондо ИМге каршы согушуп жаткан коалициянын ѳкүлдѳрү чогулат деп билдирген эле.

Ишембиде, 16-июлда, “Ислам мамлекети” Ниццада болгон теракт үчүн жоопкерчиликти ѳзүнѳ алды. Интернетте террористтер тууралуу маалыматтарга байкоо салып турган эл аралык SITE уюмунун маалыматы боюнча исламисттер чабуулду алардын “жоокерлеринин” бири жасады деп билдирип чыгышты. Теракт ИМге каршы согушуп жаткан коалицияга кирген ѳлкѳлѳрдүн бирине кол салууга чакырык айтылгандан кийин жасалганы кабарланууда.

XS
SM
MD
LG