Ссылки доступа

Орусия Алеппого 48 сааттык тынчтык орнотууга макул болду


Орусия 18-август күнү интернетте авиасоккулардан кийин жаракат алган баланын видеосу тарагандан соң Сириянын курчоодогу Алеппо шаарында 48 сааттык убактылуу тынчтык орнотууга макул болду.

Тез жардам кызматынын унаасында отурган сабыры суз, жүдөгөн, бетиндеги кан катып калган баланын видеосу Алепподогу азапты көрсөтүп турат.

Эл аралык коомчулукту бул видео кайдыгер калтырган жок. Былтыр Түркияда деңиз жээгине сүрүлүп чыккан сириялык кичинекей баланын сүрөтүнө кандай реакция жасалса, кудум ошондой таасир берди.

АКШнын мамлекеттик департаментинин басма сөз катчысы Жон Кирби Алепподогу бала тууралуу сүйлөп жатып «анын жашоосунда бир дагы күн согушсуз, кыйроолорсуз, өлүмсүз өтпөгөнүн» айтты.

Кийинки аптада күтүлүп жаткан убактылуу тынчтык Алеппого гуманитардык жүктөрдү жеткирүүгө мүмкүндүк берип, кийин болчу элдешүүлөр үчүн «пилоттук долбоор» болуп калат, деп билдирди бейшемби күнү кечинде орусиялык генерал Игорь Конашенков. Ал Орусия гуманитардык кербендер «өкмөттүк аскерлердин көзөмөлүндөгү аймактар аркылуу» Алеппого өтсө алардын коопсуздугун азыр деле камсыз кылууга даяр экенин айтты.

XS
SM
MD
LG