Ссылки доступа

Түркмөнбашы өлкө жетишкендиктерин дүйнөгө жайылтууну күчөтүү талабын койду


Түркмөнстан президенти Гурбангулы Бердымухамедов өкмөт жыйынында өлкөнүн жетишкендиктерин жайылтууну күчөтүүнү талап кылды. Бул тууралуу жергиликтүү ММКлар жазышты.

«Биздин көз карандысыз мекенибизде өлкөнү таанылгыс кылып өзгөртүп жаткан укмуштуудай долбоорлор ишке ашырылууда. Элдин социалдык жашоо деңгээли жогорулап, жаңы шаарлар, айылдар пайда болууда, ири көпүрөлөр, аба майдандар, мектептер менен университеттер курулууда. Заманбап техника менен жабдылган ишканалар түзүлүп жатат», — деди өлкө башчысы.

Бирок президенттин пикиринде, Түркмөнстандын ийгиликтери тууралуу башка өлкөлөрдө жетиштүү деңгээлде билишпейт жана аларды жайылтуу маселеси жаңы ыкмаларды талап кылууда.

Бердымухамедовдун айтымында, ондогон, жүздөгөн маалымат агенттиктерин курамына камтыган ири жана абройлуу журналисттик уюмдар менен болгон мамилелерди жөнгө салуу керек. «Түркмөнстан ал уюмдарга мүчө болуу менен дүйнөлүк ММКлар менен тыгыз кызматташууну жолго коюп, алар аркылуу биздин бардык жетишкендиктерибизди чагылдарган материалдарды ыкчам жайылтуу мүмкүнчүлүгүнө ээ болот», — деди президент.

Аны менен катар өлкө башчысы түркмөн ММКларын кайрадан түзүп чыгуу зарылдыгын белгиледи. Президенттин пикиринде, Мамлекеттик түркмөн маалымат агенттигинин түзүмүн өзгөртүп, кызматкерлеринин санын көбөйтүү керек. «Менимче, эгер агенттиктин кызматкерлеринин жарымы чет мамлекеттер үчүн, калганы өзүбүз үчүн маалымат даярдап турса туура болот», — деди Бердымухамедов.

XS
SM
MD
LG