Ссылки доступа

Туркманистонда президентликка сайланиш учун ёш чекловлари бекор қилинди


Туркманистон парламенти мамлакатнинг янги Конституциясини қабул қилди, унга кўра президент бўлиб сайланиш учун белгиланган ёш бўйича чеклов бекор қилинган ва президентлик ваколатлари беш йилдан етти йилгача узайтирилган. Янги Қонун чоршанба куни Туркманистон президенти Қурбонгули Бердимуҳамедов унга имзо қўйганидан кейин кучга кирди.

2008 йилда қабул қилинган Конституцияда президент лавозимига сайланишнинг ёш бўйича чеклови - 70 ёш белгиланган эди. Асосий Қонуннинг янги таҳририда “70 ёшдан ошмаган” деган жумла олиб ташланган.

Навбатдаги президент сайловлари Туркманистонда 2017 йилда бўлиб ўтади. Ҳозирги Туркманистон президенти Қурбонгули Бердимуҳамедов 2007 йилдан бери ҳокимият тепасида бўлиб келмоқда, у иккинчи муддатга 2012 йилда қайта сайланган эди.

ЕХҲТ (Европада Хавфсизлик ва Ҳамкорлик Ташкилоти)да Конституцияга киритилган тузатишларнинг баъзилари маъқулланди, хусусан, судда иш кўрилишининг ҳаққоний бўлишини кафолатлаш борасида. Бунда ушбу ташкилотда партияларнинг “диний ёки миллий белги” бўйича ташкил этилишининг ман этилиши танқид остига олинган, шунингдек президентлик ваколатлари муддатларини чўздирмаслик тавсия этилган, деб хабар қилади “Немис тўлқини” (Deutsche Welle).

Human Rights Watch ҳуқуқни муҳофаза қилиш ташкилоти Туркманистондаги режимни жаҳондаги энг репрессив режимлардан бири деб ҳисоблайди.

XS
SM
MD
LG