Тожикистон Миллий Хавфсизлик Қўмитаси раисининг ўринбосари ўтган йил охирида парламентда сўзга чиқиб, тожик сим-карталари Толибон қўлига тушганлигидан ҳавотир билдирган эди. Шунинг учун ҳам у сотилган 7 миллион сим-карталарни қайтадан рўйхатга олиш зарурлигини айтган.
Мобил операторлар уюшмаси раиси Ғофуржон Эркаевга кўра, бу ташаббус хизматлар нарҳининг ошганлиги ва сим-карталардан фойдаланишни тартибга солиш билан боғлиқ. Унинг айтишича, «авваллари мобил ва NGN-номерларининг арзонлиги туфайли, сим карта учун компания пул тўлар эди. Шу боис кўплаб мижозлар бир ва ундан ортиқ сим-картага эга эдилар. Рақамларнинг нарҳи сезиларли даражада ошиши билан, бундай мажбурият мижозларнинг ўзларига юклатилди ва мижозлар сони кескин камайди».
Баъзи экспертлар бу жараённи Афғонистон шимолидаги тожик террористлари томонидан сим-карталарнинг ишлатилишини олдини олишга ҳаракат, деб баҳолашмоқда. Бу ҳақда, жумладан, Тожикистон Миллий Хавфсизлик Қўмитаси раисининг ўринбосари Мансур Умаров ўтган йил декабр охирида гапирган эди. Унинг сўзларига қараганда, сим-карталарнинг 70 фоизи аниқ бўлмаган вазиятларда сотилган, шунинг учун қайта рўйхатдан ўтказишдан бош тортганлар сим-карталаридан айрилишади.