Ссылки доступа

Тажикстанда 82 жаштагы эне уулунан алимент өндүрүп алды


Тажикстандын Хатлон облусундагы 82 жаштагы байбиче сот аркылуу тун баласынан алимент талап кылды. Сот анын өтүнүчүн канааттандырып, баласын ай сайын 70 сомони (9 долларга жакын) төлөп берип турууга милдеттендирди. Тажикстанда административдик мыйзамдар боюнча эмгекке жарамдуу балдар пенсиядагы ата-энелерин багуусу керек.

Сангин Мирзоева беш жылдан бери араң басат, улуу баласынан чоң үмүт артып келгени менен ал материалдык жактан жардам бербейт. Мындан улам чоң эне кайрымсыз уулунан айына 300 сомони алимент алып туруу үчүн райондук сотко арызданган.

«Мен майыпмын, ал болсо мени карабайт. Араң дегенде сотко бардым, алар болсо болгону 70 сомони өлчөмүндө алимент чектешти, бул өтө эле аз, көбүрөөк өндүрүп беришсе болмок. Себеби уулум менен неберелерим иштейт. Багып чоңойткондон кийин кылган жакшылыктары ушул», - деп үшкүрдү байбиче.

Сангин Мирзоева жаш кезинде эле жесир калган. Алты баланы тарбиялап чоңойткон, алардын экөө жарандык согуш учурунда курман болушкан. Учурда чоң эне кенже уулу менен жашайт, эки кызы ажырашып келишкен, алар дагы апасы менен чогуу турушат.

Кубодиён районунда мындай көрүнүш экинчи сапар кайталанып жатат. Сотко кайрылган карыган ата-энелердин өтүнүчтөрү адатта канааттандырылат.

XS
SM
MD
LG