Олланд иккинчи марта президентликка сайланишдан воз кечган Бешинчи Француз Республикасининг биринчи президенти бўлди. Журналистларга мурожаат қилар экан, у францияликларни Миллий фронт ултра-ўнг партияси номзоди Марин Ле Пенга овоз бермасликка чақирган.
Олланд унинг Социалистик партиядаги сафдоши Мануэл Валс ўз номзодини давлат раҳбари лавозимига қўйилишига рози бўлганидан сўнг, президентлик пойгасида қатнашишдан воз кечган. Олланд ўзининг паст кўрсаткичлари туфайли шундай қарорга келганини айтган. Жамоат фикрини ўрганиш бўйича октябр ойида ўтказилган сўровномага асосан французларнинг атиги 4 фойизигина уни қўллар экан.
Социалистларнинг бирламчи сайлови 2017 йил январда бўлади. Француз консерваторларининг яқинда ўтказилган дастлабки сайловида собиқ бош вазир Франсуа Фийон ғолиб бўлган. Уни Россия билан яқин алоқалар тарафдори деб билишади. Аввалроқ у Москвага қарши киритилган санкцияларни бекор қилиш масаласини кўриб чиқишга ва у билан Сурияда ҳамкорлик қилишга тайёр эканлигини айтган эди.