Түркіменстанда өтетін президент сайлауына бірінші рет үш саяси партия - Демократиялық, Өндірісшілер мен кәсіпкерлер және Аграрлық партия өкілдері қатыспақшы. Ресми БАҚ-тың хабарлауынша, тіркелген үміткерлерге ұлттық және халықаралық заңдарға сәйкес барлық мүмкіндіктерін тең пайдалануға жағдай жасалған.
Түркіменстанның мемлекеттік арналары қазіргі президент, Демократиялық партия атынан тіркелген Гурбангулы Бердымухамедовтен басқа кандидаттардың сайлауалды сөздерін көрсетіп жатыр.
2016 жылдың желтоқсан айында президентікке өзін үшінші рет ұсынып отырған Бердымухамедов өзге үміткерлердің пайдасына эфирге шығудан бас тартқан.
Жергілікті бақылаушылар халықтың президент сайлауына деген қызығушылығы төмен дейді. 2016 жылдың қыркүйегінде қабылданған жаңа Конституцияға сәйкес, ел президенті жеті жылға сайланады. Осы уақытқа дейін Түркіменстандағы сайлаулар халықаралық ұйым алдында таза әрі әділ өтті деп мойындалған жоқ.