Савченконың екінші адвокаты Марк Фейгин Новочеркасскадағы тергеу абақтысында Савченкомен кездесуде президент Порошенконың құрғақ аштықты тоқтату жөніндегі өтініш хатын жеткізгенін мәлімдеді.
Надежда Савченко келісіп, жауап ретінде өзін қолдағаны үшін барлық украиналықтарға алғысын білдіретінін жеткізген. Ол 21-22 наурызда болатын сот үкіміне дейін күресетінін мәлімдеген. Адвокаттың сөзінше, Савченко аштықты тоқтатуын шегіну деп есептемейді. Ол мұны жеңіс ретінде қабылдайды және Украина билігінің оны босатуға әрекеттенуі жеңіспен аяқталады деп үміттенеді. Алдын Украина президенті Петр Порошенко Надежда Савченконы үйіне қайтару үшін, алмастыруға дайын екенін білдірген. Адвокаттың сөзінше, егер екі тарап келіссе, Савченко сәуір айына дейін үйіне оралуы мүмкін.
Надежда Савченко 3 наурыздан бері оған соңғы сөзін айтуға мүмкіндік бермегені үшін, құрғақ аштық жариялаған. Киев Савченкоға дәрігер жеткізбекші болды, алайда Ресей билігі оның соттағы әрекеттері үшін қарсылық білдірді.