Моҳи гузашта VimpelCom Ltd. расман эълон кард, ки барои дарёфти ҳаққи фаъолияти тиҷоратӣ дар Ӯзбекистон ба "як соҳибнуфуз"-и ин кишвар пора додааст.
Бино бар иттилои вазорати адлияи ИМА, VimpelCom Ltd. ва ширкати тобеаш дар Ӯзбекистон "Unitel" эътироф карданд, ки дар солҳои 2006 то 2012 ба афроди соҳибнуфузи ин кишвар дар маҷмуъ 114 миллион доллар пора додаанд.
Пештар аз ин ширкат гуфта буд, омодааст, фасодкориаш дар Ӯзбекистонро эътироф кунад ва ба мақомоти зидди фасоди ИМА ва Нидерландия дар ҳаҷми 795 миллион доллари ИМА ҷарима пардозад. Соли гузашта баъди ифшои фасодкорӣ дар Ӯзбекистон пулиси Норвегия роҳбари пешини VimpelCom Ltd.-ро ҳабс кард. Баъдан ошкор шуд, ки намояндагиҳои дигари ширкатҳои мобилӣ дар Ӯзбекистон: МТС-и Русия ва TeliaSonera-и Финдландияву Шведсия низ "ба афроди соҳибнуфуз"-и ин кишвар пора додаанд.
Вазорати адлияи ИМА мегӯяд, феълан барои мусодираи 850 миллион доллари шаҳрванди соҳибнуфузи Ӯзбекистон, ки дар бонкҳои Швейтсария, Белгия, Люксембург ва Ирландия нигаҳдорӣ мешаванд, ба додгоҳ муроҷиат кардааст. Хабар дода мешавад, ки соҳиби ин ҳисобҳои бонкӣ духтари калонии президенти Ӯзбекистон Гулнора Каримова аст.