Бұған дейін Кэмерон ешқандай офшорлық компанияға қатысы жоқтығын айтқанымен, бұрын-соңды болған-болмағанын нақтыламаған еді. Ол жалақысы мен жинаған ақшасынан түсетін пайыздық табысқа күн көретінін мәлімдеді.
Парламенттік оппозиция бұған дейін премьердің туысының аты "панамалық құжаттарда" аталуына байланысты тәуелсіз тексеру жүргізуге шақырған. Біріккен Корольдіктің салықтар мен кеден мәселелері бойынша Қызметі де құжаттарды мұқият тексеретінін мәлімдеген.
Жақында жария болған панамалық Mossack Fonseca офшорлық компаниясының құжаттарында премьер-министрдің әкесі - Иэн Кэмерон 1980 жылдары құрылған офшорлық қорды басқарғаны, ол қордың көмегімен ауқатты британдықтардың салық төлеуден жалтарғаны туралы жазылған.