Душанбеде баспасөз мәслихатын өткізген Давлатзодтың айтуынша, елдің сақтық қоры туралы мәліметті естіген жұрт банктердегі салымдарын шығара бастап, соның салдарынан елдегі жағдай одан сайын ушығып кетуі мүмкін еді. «Елдің алтын-валюта сақтық қорын құпияда ұстау – мемлекеттік саясат. Үрей туғызған бір ғана дүрбелең халықтың Тәжікстан банк жүйесіне сенімсіздігін одан сайын күшейтіп жіберер еді», - деді ол.
Бұған дейін Дүниежүзілік Банк сарапшылары Тәжікстанның алтын-валюта сақтық қоры бар болғаны 72 күнге жетеді деп бағалаған еді. Умед Давлатзод сарапшылар пікірін қостады, тек қор көлемі халықаралық өлшеммен алғанда 90 күнге жетуі мүмкін екендігін айтты. Министрлік өкілінің мәлімдеуінше, қаржы дағдарысы басталған шақта алтын-валюта қорының бір бөлігі ұлттық валюта бағамын сақтауға жұмсалып кеткен.
Тәжік үкіметі, ұлттық валюта бағамының тұрақты деңгейде сақталуын ескере отырып, елдің алтын-валюта сақтық қорының көлемін ұлғайту мақсатында жұмыстар атқарып жатыр, деді шенеунік.