Харьков қаласының Киев аудандық соты Харьков прокуратурасының өтінішімен Тәжікстанның 39 жастағы азаматын ұстады. Ол "Ислам мемлекеті" ұйымына қатысы бар деген күдікпен Интерполдың іздеуінде болған. Харьков облыстық прокуратурасы баспасөз қызметінің хабарлауынша, сот күдіктіні уақытша 40 күнге қамау туралы үкім шығарды.
Облыстық прокуратураның халықаралық әріптестік бөлімінің басшысы Максим Белоуенконың айтуынша, осы мерзім Тәжікстанның құзырлы органдарынан оны қайтару туралы ұсыныс түскенге дейін жеткілікті болады.
Тергеу мәліметі бойынша, 2013 жылы қарашада тәжік азаматы Ресейге жұмыс істеуге барады. 2016 жылы қаңтарда Ресейден Түркия арқылы Сирияға жетеді, сол жерде ол ИМ-ге қосылады. Ол биыл Украинада ұсталды.
Хабарларға қарағанда, Тәжікстанда 39 жастағы ер кісіге "жалдану" фактісі бойынша күдік келтірілген.