Укук коргоо органдарындагы өз булактар бул маалыматты “Азаттыктын” өзбек кызматына тастыкташты. Алардын айтымында, акча төрт метр тереңдиктеги атайын кампанын ичинде сакталган. “Ахмадбайдын” казыначысынын үйүнө атайын топ Ташкенттен 26-августта келген. “Изат кассирдин үйүнөн өтө көп акча табышты. Каражатты Isuzu маркасындагы эки автоунаага жүктөп жатышканын алыстан көрүп турдук”,-деди өз булак.
Акчаны жүз пайыз үстөгү менен кайтарам деп 40 миңдей адамдын ири суммадагы каражатын топтоп алган Ташкендин Чиноз районунун тургуну Ахмад Турсунбаев 15-июнда камакка алынган.
"Ахмадбайга" алдамчылык, чет элдик валютаны мамлекеттен жашырып сактоо деген сыяктуу алты-жети айып тагылууда.
Өзбек телеканалдары даярдаган атайын берүүдө Ахмад Турсунбаев күнөөсүн моюнга алып, кардарларынан кечирим сураган.
