Дар рафти гуфтушунид раҳбарони шуъбаҳои ноҳиявию вилоятии Хадамоти марзбонии Қирғизистон ширкат доштаанд.
Женишбек Жоробеков, сардори раёсати корҳои дохилии Ҷалолободи Қирғизистон гуфтааст, ҷониби Ӯзбекистон барои озод кардани кормандони истгоҳ шартеро дар миён нагузошт.
"Ӯзбекистон шаҳрвандони моро дар натиҷаи тадбирҳои андешидаи президент, ҳукумату вазоратхонаҳо ва бар пояи созишномаи комиссияи байниҳукуматӣ озод кард. Бино ба иттилои муқаддамотӣ, нисбати кормандони истгоҳи фиристандаҳо бо гумони убури ғайриқонунии марз парвандаи ҷиноӣ боз ва ҷарима муайян шудааст. Баъди содир шудани қарори додгоҳ онҳоро ба мо доданд. Мо бо кормандон суҳбат доштем ва вазъашон хуб аст",- изҳор доштааст вай.
Ёдрас мешавем, 22 августи соли равон чархболи МИ-8 ҳафт корманди ВКД Ӯзбекистонро дар минтақаи баҳсии марзӣ, наздикии истгоҳи фиристандаҳо дар куҳи Унгар-Тоои Қирғизистон фуруд овард. Хадамоти марзбонии Қирғизистон субҳи 24 август хабар дод, ки кормандони истгоҳи фиристандаҳоро ба шуъбаи корҳои дохилии Янгиқурғони Ӯзбекистон бурданд. Мақомоти ӯзбек гуфтанд, шаҳрвандони Қирғизистон дар ин минтақа ғайриқонунӣ ҳузур доштанд.