Танлов ташкилотчиларининг қарори яқин кунларда Берлиндаги Евровидение Кузатув кенгашига топширилади. Мезбон шаҳарни эълон қилиш бир неча бор қолдирилди. Аввал у июл охирида бўлиб ўтиши лозим эди. Танловни ўтказишга буюртмаларни Киев, Днепр, Одесса, Львов, Харьков ва Херсон беришган.
Бу йил 14 майда Стокгольмда бўлиб ўтган Евровидение финалида, келиб чиқиши қрим-татар бўлган украиналик Джамала ўз халқининг Сталин бошқаруви йилларидаги депортация қилиниши тўғрисидаги «1944» ашуласи билан ғалаба қозонди. Иккинчи ўринни австралиялик ижрочи Дэми Им эгаллаган бўлса, учинчи ўринни россиялик Сергей Лазарев эгаллади. 2005 йилда Украинада Евровидение танлови биринчи маротаба бўлиб ўтган.