Ссылки доступа

Туркия аз Амрико боздошти Гюленро талаб кард


Анқара барои боздошти Фатҳуллоҳ Гюлен, руҳонии турки муқими ИМА расман ба Вашингтон дархост фиристодааст. Гюлен дар ташкили кӯшиши табаддулоти шаби 15 июли Туркия айбдор мешавад.

Мақомоти Туркия ҷонибдорони Фатҳуллоҳ Гюленро дар он айбдор мекунад, ки гӯиё барои сарнагунии ҳукумати феълии ин кишвар забон як кардаанд. Масъалаи истирдоди руҳонии турк ба ватан ибтидои моҳи сентябри соли равон зимни мулоқоти Раҷаб Эрдуғон, президенти Туркия бо ҳамтои амрикоияш Барак Обама, ки дар Чин баргузор гардид, баррасӣ шуда буд.

Ба гуфтаи намояндаи расмии маъмурияти Амрико, Обама зимни суҳбат бо Эрдуғон исрор варзидааст, ки ин масъала на ба таври сиёсӣ, балки ба гунаи ҳуқуқӣ бояд ҳал шавад.

Қаблан Туркия борҳо аз ИМА даъват карда буд, ки Гюленро ба Анқара таслим кунад. Дар як қатор шаҳрҳои Туркия низ гирдиҳамоиҳо ба ҷонибдорӣ аз ин дархост баргузор шуд. Аммо Гюлен даст доштанашро дар кӯшиши сарнагун кардани ҳукумати Эрдуғон дар суҳбат бо телевизионҳои амрикоӣ борҳо рад кардааст.

XS
SM
MD
LG