Фарид Ниязовдун айтымында, бүгүн ал телефон аркылуу Атамбаев менен сүйлөштү. Аппарат жетекчиси билдиргендей, учурда өлкө башчысын ооруканага жаткыруу чечими жок. Атамбаев «медициналык кароодон өтүү зарылдыгына байланыштуу» 20-сентябрдан тарта кыска мөөнөткө эмгек өргүүсүнө чыкты.
Буга чейин жүрөгүндөгү көйгөйлөргө байланыштуу Атамбаевдин БУУнун Башкы ассамблеясынын жыйынына катыша албай тургандыгы белгилүү болуп, кыргыз делегациясын Нью-Йоркко жетектеп баруу иши тышкы иштер министри Эрлан Абдылдаевге жүктөлгөн.
БУУнун Башкы ассамблеясынын 71-сессиясында Кыргызстандын мурдагы президенти Роза Отунбаева да баяндама жасайт. Ал Нью-Йоркко ЕККУнун төрагасы жана Германия ТИМинин башчысы Франк-Вальтер Штайнмайердин чакыруусу менен барган.
Маалымдалгандай, Отурбаева Нью-Йоркко болгон сапарынын алкагында 19-сентябрда туруктуу өнүгүү жолдору талкууланган БУУнун лидерлер кеңешинин тогузунчу жыйынына катышкан.