Ссылки доступа

Озарбайжонда конституцияни ўзгартириш учун референдум бўлиб ўтди


Асосий ўзгартиришлар: президентлик ваколати муддатини чўзиш, бўлажак президентликка номзодлар ёшини камайтириш, вице-президентлик лавозимини киритиш. Қонунга биноан, референдум бўлиб ўтган ҳисобланади чунки унда сайловчиларнинг 25% дан ортиғи қатнашган.

26 сентябр куни Озарбайжонда мамлакат конституциясига ўзгартишлар киритиш бўйича референдум бўлиб ўтди. Фуқаролар 125 та сайлов округидаги 5,627 сайлов участкаларида овоз беришди. Овоз бериш жараёнини 53,531 одам кузатиб турган. 5 миллиондан ортиқ фуқаро референдумда овоз бериш ҳуқуқига эга.

Озарбайжонда Конституция 2002 ва 2009 йилларда икки марта ўзгартирилган. Бу сафар улар "ҳа" ёки "йўқ" деб эмас, балки қайси ўзгаришни қўллаб ва қайси бирига қарши эканликларини белгилаб овоз беришган. Кузатувчиларнинг фикрича, ўзгаришларнинг асосий қисмидан кўзланган мақсад ҳукмрон оиланинг, хусусан президент Илхом Алиевнинг ваколатларини кучайтириш.

Киритилаётган ўзгаришлардан энг муҳими– президентлик ваколатларини 5 йилдан 7 йилга чўзиш. Мамлакатнинг ҳозирги раҳбари, 54-ёшли Илхом Алиев, президентликни 2003 йилда бемор отасидан қабул қилиб олганидан кейин бўлиб ўтган учта сайловларда (2003, 2008 ва 2013 йиллар) ғолиб бўлган. Унинг президентлик ваколати 2018 йилда тугаши керак эди.

Президентликка номзодларнинг энг кичик ёши (ҳозирда 35)ни бекор қилиб, парламентга сайланувчилар ёшини ҳам 25 дан 18 га тушириш таклиф этилган. Экспертларнинг фикрича, бу таклиф Илхом Алиевнинг яқиндагина 18 ёшга тўлган ўғли Гейдар учун махсус ишлаб чиқилган.

Марказий Сайлов Комиссияси референдумни бўлиб ўтган деб эълон қилган.

XS
SM
MD
LG