Болалар мажбурий меҳнатига қарши ва фермерлар ҳуқуқлари учун узоқ йиллар курашган Фарғоналик ҳуқуқ ҳимоячисини қўллаб уюштирилган кампания "Ўтюрак аёллар клуби" халқаро инсон ҳуқуқлари ташкилоти томонидан 3 октябрда бошланган.
Ташкилот раҳбари Мўътабар Тожибоеванинг айтишича, Маматхонов саккиз йиллик қамоқ жазосидан сўнг 2016 йил 4 июнда озодликка чиқиши керак эди. «Аммо, мана 4 ойдирки унинг оила аъзолари ва яқинлари унинг тақдири ҳақида ҳеч қандай маълумот олишолмаяпти», - деди у.
Ҳуқуқ фаолининг гапларига қараганда, 16 сентябр куни Маматхоновнинг ўғли Жамолхон Маматхонов отаси ҳақида билиш учун Жазони Ижро Этиш Бош Бошқармасига келган. Бироқ унга отаси (СИ №1) Тоштурмада, деб айтишган. Отасига зарур нарсаларни бериш учун у билан учрашиш илтимоси рад этилган, деди Тожибоева.
Ғанихон Маматхонов 2008 йилда қаллобликда айбланиб ҳибсга олинган ва ўша йилнинг 9 октябрида тўрт йилу беш ойлик қамоқ жазосига ҳукм қилинган.