Күн мурун Стамбулдагы кол салууга тиешеси бар болушу мүмкүн деген божомолдор менен Яхьё Машраповдун паспортундагы сүрөтү интернетке жарыяланып кеткен.
Кыргызстандын Стамбулдагы консулдугу бир катар түркиялык маалымат каражаттарынан “Рейна” түнкү клубундагы кол салууга кыргыз жараны Яхъё Машраповдун тиешеси болгон деген маалыматтарын төгүнгө чыгарууну талап кылат. Консулдуктун кызматкерлери бул маселе боюнча TRT World каналы, «Йени Шафак», «Хүрриет” агенттиктери менен байланышкандыктарын билдиришти.
Буга чейин түрк маалымат каражаттары жергиликтүү ММКларга шилтеме кылуу менен болжолдуу түрдө чабуул уюштурууга шектелген адам Өзбекстандын же Кыргызстандын жараны экенин кабарлашкан. Кийинчерээк интернетте кыргыз жараны Машраповдун паспортундагы сүрөт жарыяланып, ал кол салууга шектүү экени айтылган.
1-январга караган түнү белгисиз адам Стамбулдагы Reina түнкү клубунун кире беришинде полиция кызматкерин өлтүрүп, андан соң клубда Жаңы жыл тосуп жаткан адамдарга карата ок чыгарган. Жыйынтыгында 39 киши мерт кетип, дагы 69у жаракат алган.