Виртуал қабулхона сайтида хабар қилинишича, Ўзбекистон ИИВ ЖИЭББ бошлиғига йўлланган ҳар бир мурожаатнома, ариза ёки шикоят расмий ҳисобланади. Мурожаат қилувчилар ўзларининг фамилиялари (исми, отасининг исмини), турар жойларини кўрсатишлари, шунингдек мурожаатнинг моҳиятини тушунтириб ўтишлари лозим.
Виртуал қабулхона сайтида туҳмат, ҳақоратлар ва ёлғон хабарлар акс эттирилган мурожаатларни тақдим этиш ман этилгани маълум қилинган. Битта мурожаат қилувчининг кўп марталаб жавоби берилган саволни ўз ичига олган мурожаатномасида янги важлар ёки ҳолатлар кўрсатилмаган бўлса, бундай мурожаатномалар кўриб чиқилмайди. Ўзбекистон ИИВ ЖИЭББ бошлиғининг виртуал қабулхонаси сайтида хабар қилинишича, келиб тушган мурожаатномаларни кўриб чиқиш муддати 10 кунни ташкил этади.
Ҳозирги кунгача Ўзбекистон ИИВ ЖИЭББ бошлиғининг виртуал қабулхонасига 20 тага яқин мурожаатнома келиб тушган бўлиб, улардан биттасига жавоб берилган, 16 та мурожаатнома кўриб чиқилган ва биттаси ёпилган. Виртуал қабулхона сайтида мурожаатномаларнинг мазмуни эълон қилинмаган.
Ўтган йил декабрида Ўзбекистоннинг сайланган президенти Шавкат Мирзиёев давлат органлари раҳбарлари ва мансабдор шахсларнинг фуқаролар ва компаниялар мурожаатномалари тўғрисидаги қонунчилик талаблари ва меъёрларини бузганлик учун жавобгарликни кучайтиришга бағишланган фармон чиқарган эди.