9 июн куни «Озодлик» мухбири билан суҳбатда ўз велосипедида Ҳажга отланган Наманган вилояти Чортоқ туманида истиқомат қилувчи 75-ёшли пенсионер Ҳусан Ҳожибоев ўзбек-туркман чегарасидаги «Фараб» ўтиш-назорат пунктигача етиб борганини маълум қилди. Бироқ туркман визаси йўқлиги сабаб чегарачилар уни қўшни давлат ҳудудига ўтказмади.
У етти кун давомида 1150 километрлик йўл босиб Туркманистон чегарасигача етиб борди.
– Мени чегарадан ўтказишмади. Чегарачилар савоб учун ўтказиб юборишлари мумкинлигини айтишди. Бироқ уларнинг сўзларига қараганда, визам йўқлиги сабаб Туркманистондан чиқиш чоғида мени қўлга олишиб, депортация қилишлари мумкин экан. Шу сабабли энди мен ўз велосипедимда ортга қайтишга мажбурман, – деди Ҳусан Ҳожибоев.
Наманганлик пенсионер Ҳусан Ҳожибоев 2 июнь куни Ҳаж сафарига отланди. Ўшанда у 7 июнь оқшоми ёки 8 июнь тонгида Туркманистон чегарасига етиб олиши хақида айтган эди. Пенсионернинг ишонишича, Туркманистон, Эрон ва Саудия Арабистони чегарачилари унга қаршилик кўрсатмайди ва чегаралардан ўтказиб юборади.
2016 йилнинг сентябрь ойида Ҳусан Ҳожибоев биринчи президент Ислом Каримов хотирасини ёдга олиш учун велосипедда Самарқандга сафар қилган эди. Пенсионер ўшанда 500 километр йўл босиб давлат раҳбари қабрини зиёрат қилган эди. Facebook фойдаланувчилари ўшанда бу сафарни “кичик ҳаж”га тенглаштиришган ва унга янги велосипед совға қилишган эди.