Қонун лойиҳасида Кремлга нисбатан Дональд Трамп маъмурияти жазо чораларини сусайтирган тақдирда Конгрессга қарор қабул қилиш ҳуқуқи берилиши кўзда тутилган.
Конгресс Сенатидаги кўпчилик раҳбари Митч Макконелл овоз бериш жараёнлари шу ҳафта охирларида бўлиб ўтиши кераклигини айтди. Таклифга кўра, Эронга қарши жазо чораларини кенгайтиришга қаратилган қонун лойиҳаси ҳам муҳокама қилинади.
Ҳар икки партия вакилларидан сайланган сенаторлар билан келишилган ҳолда қабул қилинадиган янги жазо чоралари Россия разведка ва мудофаа идоралари ходимларга қарши қаратилган. Шунингдек, жазо чоралари энергетика, темирйўл ва Россия иқтисодиётининг тоғ-кон саноати тармоқларига ҳам жорий этилиши мумкин.
Янги жазо чораларида Россияда инсон ҳуқуқларини бузувчиларни жазоловчи қоидалар ҳам белгиланган.
Қонун лойиҳаси ташаббускорларининг айтишича, лойиҳа Сенатда бир овоздан қўллаб-қувватланади. Ҳозирча Оқ уйнинг бу ташаббусга муносабати маълум эмас.