Бош вазир Абдулла Ариповнинг сўзларига қараганда, мамлакатда Зираат Банкнинг очилишидан кейин Туркия ҳукумати Ўзбекистонда кичик бизнесни кредитлаш мақсадида 500 миллион АҚШ доллари ажратади.
Зираат Банк – Туркиядаги энг йирик кредит ташкилоти бўлиб, ўз фаолиятини 1863 йилда бошлаган. У жаҳоннинг 18та мамлакатида банк хизматларини кўрсатади.
Бундан аввал, тез орада Ўзбекистонда Туркиянинг Demir Holding компанияси ўз фаолиятини қайта тиклаши борасида хабар тарқатилган эди. Бу компания назорат идоралари томонидан текширувлар бошлангани сабаб Ўзбекистонни 2010 йили тарк этган эди.
Эслатиб ўтамиз, шу йилнинг май ойида Тошкентда бўлиб ўтган ўзбек-турк бизнес-форумида томонлар ўртасида қиймати 2 миллиард долларга тенг бўлган ҳужжат ва битимлар имзоланган эди. Бу ҳужжатларга кўра, тўқимачилик, электротехника, фармацевтика, қурилиш ва банк соҳасида 30га яқин лойиҳа ҳаётга татбиқ этилиши кўзда тутилган.