Ссылки доступа

Ўзбекистонлик таксичи йўқолган 100 минг рублни эгасига қайтариб берди (аудио)


Москвада ўзбекистонлик таксичи салонида қолдириб кетган 100 минг рубл (тахминан 1700 АҚШ доллари) ва бошқа ҳужжатларини мижозига қайтариб берди. Асли кировлик бўлган йўловчи Павел Шапкин таксичи йигит билан селфи тушди, аммо хурсандлигидан ҳатто унинг исмини сўраш ёдидан чиқибди.

Шу йилнинг 17 июн куни Москвада кўчада такси тўхтатган россиялик Павел Шапкин манзилга етиб, шошилганидан машинанинг орқа ўриндиғида ҳамёнини қолдириб кетади.

Бироқ, бирмунча вақт ўтиб, ҳамёни ва ичидаги пул ҳамда бошқа қимматбаҳо буюмлар Ўзбекистонлик экани аниқланган номаълум таксичи томонидан қайтариб берилди. Маълум бўлишича, таксичи ҳамённи автомобилнинг орқа салонида топиб, ичидаги визиткаларни банк карталари билан солиштириб, ундаги кўрсатилган номерга қўнғироқ қилган.

Павел Шапкин ўзининг “Инстаграм” саҳифасида бу ҳодисани қуйидагича тасвирлайди: "Вазиятни тўлиқ тасвирлаш учун мен ҳамён ичида тахминан 100 000 рубл (қарийб 1700 АҚШ долл.) ва яна бор пулим турган барча карталарим борлигини айтишим керак. Мен уни қаерда туширганимни ҳатто тасаввур қила олмасдим. Бир вақт қўнғироқ жиринглаб, оддий ўзбекистонлик йигитча ҳамёнимни топгани ва уларни қайтармоқчи эканини билдирди. У буни ота-онасидан шундай тарбия олгани билан изоҳлади".

"Мен ич-ичимдан таъсирландим. Ахир унга ҳам бу пуллар ортиқчалик қилмаслигини тасаввур қила оласизми? Оиласи ва ёш аёли учун ҳам. У эса мени топди ва ҳаммасини қайтарди. Таърифлашга тил ожиз. Расм эса эсдалик учун", - деб ёзди Павел Шапкин.

Ушбу хабар ижтимоий тармоқларда қисқа вақт ичда бир неча мингдан зиёд "лайк" йиғди ва кўплаб ижобий изоҳларга сабаб бўлди.

XS
SM
MD
LG