Аҳмад Турсунбоев xалқ орасида "Аҳмадбой" номи билан танилган табдиркор "пирамидасидан жабр чеккан ўнлаб одам шу куни судга келиб, судлов ўтаётган залга киришга уринди, лекин бўш жой қолмаганлиги сабабли уларнинг кўпчилиги суд залига киритилмади.
- Одамлар пулларини, машиналарини талаб қилиб судга келишган, лекин киритилмади. Фақат рўйхат бўйича киритяпти. Суд очиқ дейди, лекин элликдан ортиқ одам ташқарида қолдик. Ўтирадиган жой йўқ экан, - дейди Аҳмадбой судига келган Зарифа исмли аёл.
Жиноят ишлари бўйича Тошкент вилоят суди мулозими Аҳмадбой Турсунбоев билан бирга унинг ҳисобчиси ва ғазначилари, жами 7 судланувчи бугун суд залига олиб келинганини айтди.
"Суд очиқ бўлаётгани учун таклиф этилмаган одамлар ҳам келган. Судда одамлар тикка туриши мумкин эмас, - деди суд мулозими.
“Чиноз ҳалол чорва” ва “Чиноз авто ҳамкор” масъулияти чекланган жамиятларнинг муассиси Аҳмадбой Турсунбоев одамлардан бир йилда икки баробар қилиб қайтариш шарти билан катта маблағларни ноқонуний равишда олиб келганликда айбланмоқда. Аҳмадбой ўтган йилнинг июн ойида қўлга олинган. Унга тегишли эканлиги айтилаётган 12 миллион доллардан ортиқ пул ашёвий далил сифатида олиб қўйилган. 38 ёшли тадбиркорга пул берган ва олган одамларнинг сони бир неча ўн мингдан кўп экани айтилади.