Ссылки доступа

ОАВ: Ироқ ИД жангариларининг юзлаб оилаларини ушлаб турибди


Reuters янгиликлар агентлиги Ироқ ҳукумати «Ислом давлати» (ИД) гуруҳи жангарилари эканлиги гумон қилинаётганларнинг 1400 нафар хорижлик хотинлари ва болаларини ушлаб турганлигини хабар қилмоқда.

Reuters хавфсизлик органлари ходимлари ва ҳуқуқий ёрдам ташкилотларининг ходимларига таянган ҳолда, 10 сентябрь, якшанба куни ушлаб турилганларнинг аксарияти Туркиядан келганлигини хабар қилди.

Агентлик хабарига кўра, уларнинг қолганлари Тожикистон, Озарбайжон ва Россиядан келган. Ушлаб турилганлар орасида Осиёдан келганлар ва Франция ёки Германиянинг «жуда озчилик» фуқаролари ҳам бор.

Reuters хабарига кўра, ушланганлар аввалроқ ҳукумат кучлари томонидан бу гуруҳнинг Ироқдаги қолган таянч пунктларидан, жумладан Мосул шаҳридан сиқиб чиқарилган ИД жангариларининг хотинлари ва болаларидир.

Бу аёллар ва болалар Мосулдан жануброқда жойлашган лагерда сақланаётгани хабар қилинмоқда.

Разведка хизмати офицерларидан бирининг айтишича, ҳукумат ушланганларниг шахсини ва фуқаролигини аниқлашга уринмоқда,чунки ушлаш пайтида улардан кўпчилигининг ёнида ҳақиқий ҳужжатлари бўлмаган. Ироқ армиясининг полковниги Аҳмад ал Тоий Reutersга ҳукумат топшириғини олгунча, экстремистларнинг оилалари армия қўлида бўлишини айтди.

Reuters агентлик мухбирлари юзлаб аёллар ва болалар гуманитар ходимлар томонидан «ҳарбийлашган ҳудуд» деб номланган жойларда, шамоллатишнинг иложи бўлмаган чодирларда, ҳашаротлар ғужғон ўйнаётган матрасларда биргаликда ўтирганини кўрганликларини хабар қилмоқда.

XS
SM
MD
LG