Жиынды жүргізген құқық қорғаушы Евгений Жовтис Жанболат Мамайға тағылған айып "дәлелденбеді" деп санайтынын білдірді.
Биыл ақпанның 10-ы күні "Әблязовтың ақшасын газет шығару арқылы заңдастыруға қатысты" деген күдікпен Алматыда қамауға алынған Жанболат Мамай жеті айдан кейін, 7 қыркүйекте сот үкімімен шартты түрде бостандығы төрт жылға шектеліп, босап шыққан. Жанболат Мамай осы уақытта өзіне қолдау білдірген ақпарат құралдары мен халықаралық құқық қорғау ұйымдарына және қоғамдық белсенділерге алғысын айтты.
Мамай сот шешіміне қарсы апелляциялық шағым түсірмеу туралы шешімді қоғам белсенділері және құқық қорғаушылармен ақыладаса келе қабылдағанын, шағым түсіруді "бекерге уақыт өткізу" деп білетінін мәлімдеді.
