Ба рӯйхати нави таҳримшудаҳо 149 шахси воқеию 38 ҳуқуқӣ шомиланд. Дар миёни онҳо номи сиёсатмадорону фаъолони мадании рус, раҳбарони ҷумҳуриҳои худхондаи Донетску Луганск ва намояндагони ҷудоихоҳон низ ҳастанд.
Номи сафири нави Русия дар Иёлоти Муттаҳида Анатолий Антонов низ ҳанӯз дар ин рӯйхат мавҷуд аст. Танҳо се нафар, ки фавтидаанд, аз рӯйхат берун карда шуданд.
ИА соли 2014, баъди ишғоли Қрим зидди Русия таҳрим эълом кард. Муҳлати таҳримҳо бори охир моҳи август ба далели интиқоли дастгоҳҳои Siemens ба Қрим тамдид шуд. Москва иддаои таҷовузкорӣ зидди Украина ва ҳимоят аз ҷудоиталабонро дар Донбасс рад мекунад.