Ссылки доступа

ФСБ Орусиядагы адамдарды жапырт эвакуациялоо боюнча комментарий бербөөнү буюрду


Орусиянын Өзгөчө кырдаалдар жана Ички иштер министрликтери бомба тууралуу жашыруун билдирүүлөрдөн улам өлкө шаарларында адамдардын жапырт эвакуацияланышы боюнча комментарий берген жок. Буга Федералдык коопсуздук кызматынын буйругу себеп болгонун Орусиянын «Ведомости» басылмасы жазды.

Маалыматка караганда, жашыруун телефондук чалууларды тергөө менен алектенип жаткан ФСБ адамдарды дүрбөлөңгө түшүрбөө жана башка телефондук террористтердин каалоосун күчөтпөө үчүн окуя боюнча комментарий бербөөнү буюрган.

Орусия шаарларындагы бекеттерде, соода борборлордо жана окуу жайларда жардырууларды уюштуруу коркунучу тууралуу жашыруун билдирүүлөр укук коргоо органдарына 10-сентябрдан тарта келип түшүүдө. Андан бери өлкөнүн ондогон аймактарында жүз миңден ашык киши эвакуацияланды. Бирок текшерүү иштеринен кийин ал билдирүүлөрдүн бири дагы ырасталган жок.

«Интерфакс» агенттигинин маалыматы боюнча бомба тууралуу билдирүүлөрдүн көбү Украинанын аймагындагы интернет-каналдар аркылуу келген. Жашыруун билдирүүлөргө «Украинанын кибераскерлери» деп аталган топтун тиешеси бар болушу мүмкүн деген версияны уюмдун лидери Евгений Докукин төгүндөдү. Буга чейин өлкөнүн Ички иштер жана Өзгөчө кырдаалдар министрликтери антитеррористтик машыгуулар өтүп жаткандыгы тууралуу версияны четке какты. Ал эми ФСБ бул боюнча эч кандай комментарий бере элек.

XS
SM
MD
LG