Лойиҳанинг умумий майдони 3 851 квадрат метрни ташкил қилади.
Уч қаватли янги мактаб барча қулайликларга эга, жумладан, бинода спорт ва фаоллар заллари, меҳнат хонаси, тиббиёт пункти, ошхона, ёзги спорт комплекси ва бошқалар мавжуд. Айни дамда бинонинг пойдевори якунланди.
Бундан ташқари Ўзбекистон қурувчилари янги объект ҳудудидаги - 1936 йилда қурилган ва бир қисми авария ҳолатида бўлган 18-сонли мактаб-гимназия биносини таъмирлашди.
Эслатиб ўтамиз, 28 июнь куни Ўзбекистоннинг Қирғизистондаги элчиси Комил Рашидов ва Қирғизистон Таълим ва фан вазири Гулмира Қудайбердиева Ўш шаҳрида янги ўқув муассаси қурилиши борасидаги Битимни имзолаган эди. Мактаб Ўзбекистон бюджети ҳисобига қурилади ва Қирғизистонга мулк сифатида берилади.
Шу йилнинг 5 сентябрь куни Қирғизистонга давлат ташрифи билан борган Ўзбекистон президенти Шавкат Мирзиёев Ўшда қуриладиган янги мактаб лойихаси билан Алмазбек Атамбоевни таништирган эди. Ҳар икки мамлакат ҳукуматлари мазкур мактаб ўзбеклар ва қирғизлар ўртасидаги дўстлик алоқаларининг янада мустаҳкамланишига ҳисса қўшишига умид билдирмоқда.