Министр Абаев "насихат" дегенде теріс идеяларға қатысты екенін айтады. Яғни суицидті, терроризмді, радикалды діни көзқарасты, ұлттық және нәсілдік араздықты насихаттау.
Министр сонымен бірге "БАҚ туралы" заң жобасында жеке бастың, отбасылық, дәрігерлік, банктік, коммерциялық және заңмен қорғалатын өзге де құпияларды таратуға келісім алуды міндеттеу ұсынылғанын да айтты.
—Біз журналистерге шенеуніктердің қымбат көліктері немесе қанша жылжымайтын мүлігі бар деген ақпаратты жариялауға тыйым салмаймыз. Бұлар жоғарыда келтірген құпия тізімге енбейді. Шенеуніктердің туыстарына қатысты мәліметтер де құпиялылыққа жатпайды, — дейді Дәурен Абаев.
Министр мемлекеттік органдардың журналистер жіберген сұраққа жауап беруді 15 күнге дейін созуға да түсініктеме берді. Ол соңғы кезде БАҚ тарапынан сұрақтар көлемі көбейіп кеткенін, олардың мұқият жауап беру үшін уақыт кететінін айтады.