Юта штати собиқ губернатори, республикачи Жон Хантсман март ойидаёқ Москвага элчи этиб тайинланган эди. Оқ уй Москвадан розилик келмагунга қадар, унинг номзодини расман тасдиқлаш учун Сенатга юбормаган эди. Кремль томонидан Хантсманга ва Оқ уй томонидан Россиянинг янги элчиси Анатолий Антоновнинг фаолиятлари учун розилик июль ойида президентлар Дональд Трамп ва Владимир Путин ўртасида Гамбургда “Катта йигирмалик” саммитида бўлиб ўтган учрашув вақтида берилган эди.
Кейинчалик Сенатда қилган чиқишида Хантсман Москва олиб бораётган сиёсатни ташқи сиёсатдаги АҚШ учун чақириқ эканлигини таъкидлаган эди. Унинг сўзларига қараганда, Россия қўшни давлатлар суверенитетини бузган ҳолда Европада хавфсизлик ва барқарорликка таҳдид солишда давом этмоқда. Хантсман Москва 2016 йилги президентлик сайловларига “шубҳасиз аралашган” дея баёнот берди ва бу масалани Россия расмийлари билан муҳокама қилишини айтди. Кремль сайловларга аралашувларни инкор қилади.
Хантсман АҚШниннг Сингапур ва Хитойдаги элчиси бўлган. 2012 йилда у ўз номзодини президентликка кўрсатган. Хантсманнинг оиласи Россияда тижорий манфаатлари бўлган йирик кимёвий корхонага эгалик қилади. У тадбиркор сифатида Россияга ташриф буюрган.