Ўзбекистон Бош вазири Абдулла Арипов 24 сентябр кунги ҳукумат йиғинида 1 октябрдан жисмоний шахсларнинг чет эл ваютасини нақд харид қилишига рухсат берилишини айтган эди.
Xабар қилинишича, "Халқ банки", "Миллий банк", "Ипотека банк" ва Тошкентдаги бошқа банкларнинг валюта айирбошлаш шоҳобчаларида чет эл валюталари жисмоний шасхларга нақд сотилмаётир.
Ўзбекистонда 5 сентябрдан бошлаб юридик ва жисмоний шахсларнинг хорижий валютани тижорат банкларида сотиш-сотиб олишига рухсат берилган. Аммо жисмоний шахсларнинг валютани нақд эмас, конверсион банк карталарига тушириб олиши ҳамда бу пулдан фақат чет элда фойдаланиши мумкинлиги белгиланган эди.
Тошкент шаҳридаги банкларда бўлган тошкентлик Тошбек айтишича, нақд валютага эҳтиёжи бўлганлар ҳануз валюта "қора бозор"ига мурожаат қилмоқда. "Қора бозор" аввалгидай эркин эмас, валютафурушларда чўчиш бор. Аммо, бекитиқча савдо қилишаяпти. Албатта, бу бозор тезда йўқ бўлиб кетмайди. Бунга маълум вақт керак бўлади", – дейди суҳбатдош.
Reuters агентлигининг хабар қилишича, Ўзбекистон ҳукумати миллий валюта девальвацияси оқибатларини юмшатиш учун Жаҳон банки билан 1 миллиард АҚШ доллари миқдорида қарз олиш бўйича музокаралар олиб бормоқда.