Эрдўғон ва у бошчилигидаги делегация режасида Эрон президенти, президентнинг биринчи ўринбосари билан учрашувлар ва ҳамкорлик тўғрисидаги шартномани имзолаш бор. Эрдўғоннинг Эрон раҳбарияти билан икки томонлама ҳамкорликни, халқаро ва минтақавий долзаб масалаларни, Ироқ ва Суриядаги вазиятни муҳокама қилиши кутилмоқда.
Туркия Президенти Ражаб Тайип Эрдўғон куни кеча баёнот бериб, 4 октябрь куни Теҳронга ташрифи давомида Ироқ курдлари мухториятида мустақилликка бағишланган референдумни муҳокама қилишини маълум қилган эди.
«Эронда биз шимолий Ироқни муҳокама қиламиз ва шундан сўнг қўлимизда жиддий йўл харитаси бўлади», - деди Эрдўғон. Ҳар икки томоннинг фикрича, референдум натижаларидан сўнг экстремистик курд гуруҳларининг, жумладан Ироқ ва Суриядаги ҳаракати фаоллашади. Шу сабабли ҳам Теҳрон ва Анқарага бу таҳдидларга қарши биргаликда ҳаракат қилиш учун механизм яратиш зарурияти пайдо бўлди.
Эслатиб ўтамиз, Ироқ, Туркия ва Эрон Ироқнинг Курдистон минтақасига мурожаат қилиб режалаштирилган мустақилликка бағишланган референдумдан воз кечишга чақиришган, овоз бериш ўтказилгудек бўлса “қарши чоралар” кўриш билан пўписа қилишган эди. Шунга қарамай, минтақада 25 сентябрь референдум бўлиб ўтди. Бундан аввал курд мухторияти сайлов комиссияси Ироқдан мустақил бўлишга қаратилган референдум бўлиб ўтганини эълон қилди.