Ссылки доступа

Ооганстанда талиптердин кол салуусунан онго жакын полициячы мерт болду


«Талибан» кыймылынын Ооганстандын түштүк-чыгышындагы көзөмөл-өткөрмө бекетке кол салуусунан кеминде тогуз полиция кызматкери мерт болуп, төртөө жаракат алды. Бул тууралуу жергиликтүү бийлик өкүлдөрү билдиришти.

Газни провинциясынын губернаторунун басма сөз катчысы Ариф Нуринин билдиришинче, жети саатка созулган 30-октябрдагы атышуунун жыйынтыгында жети согушкер өлтүрүлгөн.

Кол салуу үчүн жоопкерчиликти «Талибан» кыймылы өзүнө алды. Провинция кеңешинин мүчөсү Нисар Ахмад Факири кол салуу маалында Кухьяни районундагы өткөрмө-көзөмөл бекети талкаланганын айтты.

30-октябрда Ооганстандын түндүгүндөгү Баглан провинциясынын бийлиги өкмөттүк күчтөр талиптердин чабуулунун мизин кайтарганын кабарлаган. Бурка райондук полиция бөлүмүнүн башчысы Мухаммад Али согушкерлер полиция имаратына дүйшөмбү эртең менен кол салганын билдирди. Анын айтымында, бир нече саатка созулган атышуунун жүрүшүндө 20 жоочу жаркат алып, бир тобу мерт болгон. Андан тышкары бир ооган аскер кызматкери жеңил жараат алган.

XS
SM
MD
LG