"Сиёсий мулойимлик – яхши, аммо бу каби холатларга мос тушмайди!" – дея ёзди Трамп ўз твиттерида Манхеттен марказида юк машинасининг велосипед йўлакчасида одамлар устига бостириб борганидан сўнг бир неча соат ўтиб. Ҳодиса оқибатида 8 киши ҳалок бўлиб, 10 дан ортиқ кишги жароҳат олди.
Юк машинаси рулини 29 ёшли Сайфулло Соипов бошқарган эди. У ҳибсга олинди. Дастлабки маълумотларга кўра, у бир неча йил муқаддам АҚШга Ўзбекистондан келган ва аввалига Флоридада, сўнг Нью-Жерси штатининг Патерсон шаҳрида истиқомат қилган. Айни шу шаҳарда юк машинасини ижарага олиб терактни уюштирган. Хабарларга кўра, ҳайдовчи юк машинасини мактаб автобусига олиб бориб урган. Шундан сўнг у қўлида иккита тўппонча билан автомобилдан чиққан. Унга қарши полиция ходими югуриб келган ва унга қарата ўқ отган. Ҳужум қилган шахс қорнидан жароҳат олди. Соипов шифохонага олиб борилган ва операция қилинган. Унинг ҳаёти хавф остида эмас.
Ҳужум қилган шахснинг автомобилидан ёзув топилди. Ёзувда унинг “Ислом Давлати” террор гуруҳига содиқлиги таъкидланади. Ҳодиса ФТБ томонидан тергов қилинмоқда.
2016 сайлов компанияси даврида Трамп хавфсизлик нуқтаи назаридан ноқонуний муҳожирларга қарши кескин зарба беришни ваъда қилган эди. У АҚШга келувчи хорижликлар “ҳаддан зиёд” текширилиши кераклигига чақирган эди.