Додгоҳи олии Испания ҳукми ҳабси раҳбари барканоршудаи Каталония ва чаҳор узви пешини девони вазирони ӯро содир кард. Зидди онҳо бо ҷурми балвогарӣ ва сӯистифодаи пулҳои буҷаи давлат парвандаи ҷиноӣ боз шудааст. Мадрид аз додситонии Белгия хост, сиёсатмадорони Каталонияро, ки дар ин кишвар қарор доранд, боздошт кунад.
Карлес Пучдемон рӯзи ҷумъа гуфта буд, ки омодааст номзадии худро дар интихоботи минтақавии Каталония пешбарӣ кунад, вале маъракаҳои интихоботияшро аз хориҷ пеш мебарад. Ӯ афзуд, ки "бо шарофати ҷаҳонишавӣ ҳоло маъракаҳои пешазинтихоботиро метавон аз ҳама ҷо пеш бурд". Ӯ изҳор дошт, ки "худ ва ҷонибдоронашро ҳукумати қонунии Каталония медонад".