Полициядан кабарлашкандай, Аса жана Кумтыйын айылдарынын жашоочуларынын ортосундагы жаңжал 7-ноябрга оогон түнү болгон. Окуя 6-ноябрда эки айыл ортосунда каттаган автобус жүргүнчүлөрүнүн урушунан башталып, кийин түн ичинде уланган.
«Кечинде эки айыл жашоочуларынын ортосунда ок атылып, жаңжал чыккан. Жыйынтыгында райондук ооруканага түрдүү жаракаттары менен жети киши кайрылды. Андан тышкары Каракемер айылынын 30 жаштагы тургуну алган жараатынан каза болду», — деп билдиришти полициядан.
Бул иш боюнча тергөө иштери башталып, соттук-медициналык экспертиза дайындалды.
