Ссылки доступа

Тиллерсон мен Лавров Венада ортақ шешімге келе алмады


АҚШ Мемлекеттік хатшысы Рекс Тиллерсон мен Ресей сыртқы істер министрі Сергей Лавров Венада еш мәлімдемесіз кездесулерін аяқтады. Бұл екі ел арасындағы шиеленісті одан сайын күшейтуі мүмкін.

ЕҚЫҰ-ның СІМ басшыларының кеңесіндегі екіжақты кездесуден кейін Тиллерсон журналистерге түсініктеме беруден бас тартты. Ол "бір кездесуден кейін шешімге келу мүмкін емес", - деді.

Лавров пен Тиллерсон Сирия және Украинадағы соңғы жағдайларды талқылайды және Солтүстік Корея төңірегіндегі мәселелерге тоқталады деп күтілген.

Осыған дейін Тиллерсон Құрама Штаттар Ресейге қарсы санкцияларды алып тастағысы келеді, бірақ Мәскеу Украинаның шығысы мен Қырымнан әскерін алып кетпей отыр деген.

Тиллерсон сапармен Еуропада жүр. Еуропадағы қауіпсіздік және ынтымақтастық ұйымының (ЕҚЫҰ) кездесуінде сөз сөйлеген Тиллерсон Украинаның шығысындағы күшейіп жатқан зорлық-зомбылықтың бәріне Мәскеу кінәлі әрі мұны тез арада тоқтату керек деді.

Ресей болса, бұл айыптаулардың бәрін теріске шығарады. Ресей сыртқы істер министрі Сергей Лавров конференция кезінде, "барлық жауапкершілік Украинада жатыр" деді.

XS
SM
MD
LG